Айтжан Халмаханов 24 йилдан сўнг Ўзбекистон жаҳон чемпионати олтин медалини келтирди

Тошкент, Ўзбекистон (UzDaily.uz) — Хорватиянинг Загреб шаҳрида ўтаётган спорт курашлари бўйича жаҳон чемпионатидан хушхабар. Юнон-рум кураши бўйича Ўзбекистон терма жамоаси аъзоси Айтжан Халмаханов олтин медални қўлга киритди.

-63 кг вазн тоифасида баҳс олиб борган ҳамюртимиз ҳал қилувчи беллашувда жанубий кореялик Чунг Хан-Жаени мағлубиятга учратишга эришди.

Бу сўнгги 24 йил ичида юнон-рум кураши бўйича дунё биринчилигида ўзбекистонлик атлетларнинг қўлга киритган дастлабки олтин медали бўлди.

Шу тариқа, Ўзбекистон терма жамоаси мазкур мусобақада 1 та олтин, 1 та кумуш ва 3 та бронза медалларини жамғаришга эришди.

Юнон-рум кураши бўйича 60 килограмм вазн тоифасида Алишер Ғаниев кумуш медални қўлга киритди.

Бронза медаллари Ғуломжон Абдуллаев (57 кг, эркин кураш), Умиджон Жалолов (65 кг, эркин кураш) ва Абдулло Алиев (72 кг, юнон-рум кураши)га насиб этди.