Айдар Ахтареев Татаристон Республикасининг Ўзбекистондаги вакили этиб тайинланди

Тошкент, Ўзбекистон (UzDaily.uz) — Татаристон Республикаси раиси Рустам Миннихановнинг фармонига мувофиқ Айдар Ахтареев Татаристон Республикасининг Ўзбекистондаги вакили этиб тайинланди. У расман 2026 йил 9 январь куни лавозимига киришади, унинг ваколат муддати уч йилни ташкил этади.

Айдар Ахтареев Қозон шаҳрида туғилган.

У ўз меҳнат фаолиятини Қозон федерал университетида кичик илмий ходим сифатида бошлаган.

Кейинчалик узоқ йиллар давомида Татаристон Республикаси Саноат ва савдо вазирлигининг халқаро алоқалар бўлимига раҳбарлик қилиб, ташқи иқтисодий ва ҳудудлараро ҳамкорлик масалаларига кураторлик қилган.

Ўзбекистондаги Татаристон Республикаси ваколатхонаси ҳудудлар ўртасида иқтисодий, саноат, инвестиция, илмий-техникавий ва гуманитар соҳаларда икки томонлама алоқаларни мустаҳкамлаш ва ривожлантиришга кўмаклашишни мақсад қилади.

Кутилишича, унинг фаолияти қўшма лойиҳаларни амалга оширишга, ишбилармонлик алоқаларини кенгайтиришга ҳамда Татаристон билан Ўзбекистон ўртасидаги ҳамкорликни янада чуқурлаштиришга хизмат қилади.