Австриянинг Кремц Амалий фанлар университети делегацияси Наманганда

Тошкент, Ўзбекистон (UzDaily.uz) — Вена шаҳрида жойлашган Кремц Амалий фанлар университети 1994 йилда ташкил топган. Айни пайтда 3100 нафар талаба ва 560 нафар профессор-ўқитувчилар фаолият олиб боришмоқда. Университетнинг халқаро хамкорлари 200 га яқин.

Университетга Европа ҳамда халқаро сифат назорат агентликлари томонидан ISO сертификатлари (ISO 9001, ISO 14001, ISO 29990) берилган. Озарбайжон, Хитой, Миср ва Саудия Арабистони ҳамда Ўзбекистондан Иқтисодиёт университети билан қўшма таълим дастурларини йўлга қўйган.

Кремц Амалий фанлар университети кузатув Кенгаши раиси Xayns Boyer бошчилигидаги делегация Наманганга келди.

Меҳмонларни Наманган вилояти ҳокими Шавкатжон Абдураззоқов қабул қилди.

Самимий ўтган мулоқотда туризм, тадбиркорлик ва талабалар тайёрлашда ўзаро ҳамкорлик масалалари муҳокама қилинди.

Хорижий делегация вакиллари Наманганда олий таълимга қаратилаётган эътиборни юқори баҳолаб, туризм, тиббиёт соҳаларига халқаро стандартлар бўйича малакали кадрлар етказиб бериш борасида ҳамкорлик юзасидан таклиф ва мулоҳазаларини билдирдилар.

"Наманганга илк бор келишим. Гуллар юрти менда катта таассурот қолдирди. Вилоятда турзим, меҳмонхона хўжалиги ва таълимни бирлаштирган катта лойиҳани режалаштириб турибмиз. Бу дуал таълимга асосланади ва ишончим комил, ҳамкорлигимиз келажакда Наманган-Европа алоқаларида кўприк бўлади", - деди Xayns Boyer.

Таъкидлаш жоиз, айни вақтда Кремц Амалий фанлар университети ҳамда Наманган Давлат университети ўртасида ўзаро ҳамкорлик йўлга қўйилмоқда. Меҳмонлар Наманганнинг етакчи олийгоҳи фаолияти билан яқиндан танишиб, келгуси режаларни белгилаб олишмоқда.