Тошкент, Ўзбекистон (UzDaily.uz) — Стратегик ислоҳотлар агентлигида Қирғиз Республикаси Президенти ҳузуридаги Миллий стратегик ташаббуслар институти директорининг ўринбосари Шумкарбек Адилбек уулу билан учрашув бўлиб ўтди.

Учрашув давомида Стратегик ислоҳотлар агентлиги директори Баходир Рахматов Агентлик фаолиятининг асосий йўналишлари ҳақида маълумот берди. Жумладан, стратегик ислоҳотларни амалга ошириш ва комплекс таҳлил ҳамда ички салоҳиятдан самарали фойдаланиш асосида ҳудудларни ривожлантириш, ислоҳотларни амалга ошириш жараёнида хорижий экспертлар ва маслаҳатчиларни жалб этиш, “Ўзбекистон Мамлакат платформаси” доирасидаги ишлар, “Келажак учун” истиқболли ташаббуслар форумини ташкил этиш, ижтимоий объектларнинг геопорталини яратиш ва бошқа ташаббуслар ҳақида маълумот берди.

Шунингдек, Агентлик директори хорижий томонни “Деливерй Унит” ва «ИҚАС» лойиҳа офислари фаолияти билан таништирди.

Ўз навбатида, Шумкарбек Адилбек уулу Стратегик ташаббуслар миллий институти фаолияти ҳақида маълумот тақдим этди ва Қирғизистонда амалга оширилган бир қатор лойиҳалар билан ўртоқлашди. Улар орасида давлат органлари тузилмасини оптималлаштириш, давлат органларининг рақамлаштириш индексини жорий этиш, вазирлик ва идораларнинг ҳудудий бўлинмаларини сақлаб қолиш заруриятини ҳар йили “ҳудудий гилётина” тамойили асосида баҳолаш, шунингдек айрим давлат хизматларини аутсорсинг асосида кўрсатишга ўтказиш масалалари мавжуд.

Алоҳида эътибор бошқарувни рақамлаштириш ва бюрократиядан халос этиш тажрибаси алмашинуви, ҳукуматнинг ривожланиш бўйича халқаро молиявий ҳамкорлар билан ўзаро алоқаларини йўлга қўйишда “Мамлакат платформаси” моделини қўллаш масалаларига қаратилди.

Томонлар муҳокама қилинган ташаббусларнинг аҳамиятини таъкидлаб, яқин келажакда Стратегик ислоҳотлар агентлиги ва Қирғиз Республикаси Стратегик ташаббуслар миллий институти ўртасида ҳамкорлик меморандумларини тайёрлашга келишиб олдилар. Учрашув якунида, шунингдек, ҳамкорликнинг асосий йўналишлари бўйича чуқурлаштирилган ҳамкорликни кўзда тутувчи “йўл хариталари”ни ишлаб чиқиш таклифи илгари сурилди.