Asia Alliance Bank Humans'дан 65 миллиард сўмдан ортиқ маблағни тўлашни талаб қилмоқда

Тошкент, Ўзбекистон (UzDaily.uz) — Asia Alliance Bank Humans компанияларидан 65 млрд сўмдан зиёд миқдордаги қарзни суд орқали ундириш жараёнини бошлади. Бу ҳақда банк матбуот хизмати хабар берди.

Кеча ўнлаб аноним Telegram-каналларда Humans’нинг турли ташкилотлар олдидаги иддао қилинган қарзлари ҳақида бир хил мазмундаги хабарлар пайдо бўлди.

Уларда компаниянинг Yandex олдидаги қарзи гўёки 13,3 миллион долларни, Octobank олдидаги қарзи 533 млрд сўмни, Asia Alliance Bank олдидаги қарзи эса 3,9 миллион долларни ташкил қилиши айтилган эди.

Asia Alliance Bank’нинг маълум қилинишича, “Humans” МЧЖ гуруҳи ва “Humans Companies” АЖ банк олдида ҳақиқатдан ҳам бир қатор мажбуриятларга эга. Шартномалар шартларининг мунтазам бузилиши ва мажбуриятларни бажармаслик сабаб банк қарзни ундириш жараёнини бошлашга мажбур бўлган.

Баянотда таъкидланишича, суд инстанцияларида ишлар кўриб чиқилиши жараёнида АКБ “Asia Alliance Bank” 65 млрд сўмдан ортиқ миқдордаги қарзни ундириш тўғрисида даъво аризаларини киритган.

Банк, шунингдек, конструктив мулоқотга ва ўз позицияси бўйича изоҳ беришга тайёрлигини билдирган.

Бундан аввал, 8 май куни Тошкент иқтисодий суди “Узбектелеком”нинг Humans’дан 520 млрд сўмдан зиёд қарзни ундириш ҳақидаги даъво аризасини қаноатлантирган эди.

Июн ойида Тошкент туманлараро иқтисодий суди компанияни Octobank олдидаги қарзни қоплашга мажбур қилган (аниқ сумма ошкор қилинмаган).

Дастлаб Octobank қарз ва зарарлар компенсацияси сифатида 500 млрд сўмдан ортиқ миқдорни ундиришни талаб қилган. Жавоб тариқасида esa Humans банк Maroqand тўлов ташкилотидан “асоссиз бойлик” сифатида олган, компания ҳисоблашича 403,7 млрд сўмни ташкил этувчи маблағни қайтариш ҳақида қарши даъво киритган.