Тошкент, Ўзбекистон (UzDaily.uz) — АҚШ Давлат котибининг ўринбосари Кристофер Ландау Вашингтонда Ўзбекистон Хавфсизлик кенгаши раиси ўринбосари Абдулазиз Комилов билан учрашув ўтказди. Бу ҳақда АҚШ Давлат департаменти хабар берди.

Америка томони Ўзбекистоннинг мустақиллиги, суверенитети ва ҳудудий яхлитлигини қатъий қўллаб-қувватлашини яна бир бор тасдиқлади ҳамда АҚШ ва Ўзбекистон ўртасидаги стратегик шерикликни янада мустаҳкамлашга содиқлигини таъкидлади.

Давлат котиби ўринбосари Ландау Ўзбекистоннинг икки томонлама ҳамкорликни чуқурлаштириш, хусусан, фуқаролик атом энергетикаси, муҳим стратегик хомашёлар, шунингдек, кенг қамровли иқтисодий ва инвестициявий алоқалар соҳаларидаги саъй-ҳаракатларини юксак баҳолади.

У, шунингдек, ноқонуний миграция ва терроризм хавфларига қарши курашишда Ўзбекистон билан барқарор ҳамкорлик учун миннатдорлик изҳор этди.