Тошкент, Ўзбекистон (UzDaily.uz) — 2025 йил 7 июль куни АҚШ президенти Дональд Трамп Қозоғистон президенти Қасим-Жомарт Тўқаевга расмий мактуб йўллаб, жорий йилнинг 1 августидан бошлаб Қозоғистондан АҚШга олиб кириладиган барча товарларга 25 фоизлик бож тўлови жорий этилишини маълум қилди. Бу ҳақда Tengrinews.kz нашри Трампнинг Truth Social ижтимоий тармоғидаги эълонига таяниб хабар берди.

Оқ уй раҳбари эълон қилган мактуб матнида, бож тўлови мавжуд соҳа ёки секторларга тегишли алоҳида тарифлардан қатъи назар, Қозоғистондан келадиган барча товарларга тааллуқли бўлиши қайд этилган.

«Сизга ушбу мактубни йўллаш мен учун катта шараф. Бу бизнинг мустаҳкам савдо алоқаларимизни намоён этади ҳамда шундан далолат берадики, АҚШ Қозоғистон билан ҳамкорлик қилишга ҳали ҳам тайёр, ҳар қанча катта савдо дефицитига қарамасдан», — дейилади мактубда.

Трамп таъкидлашича, АҚШ ва Қозоғистон савдо соҳасидаги мавжуд муаммоларни бир неча йиллар давомида муҳокама қилиш имконига эга бўлган, аммо энди Вашингтон савдо балансидаги барқарор манфий кўрсаткичларга қарши чора кўришни зарур, деб ҳисобламоқда.

АҚШ президенти таъкидлади, ушбу бож тўлови фақат АҚШ ҳудудида ишлаб чиқариш фаолияти олиб бораётган компанияларга татбиқ этилмайди. Шунингдек, Қозоғистон томони жавоб тарифи жорий қилган тақдирда, унинг миқдори ҳам мавжуд 25 фоизлик ставкага қўшиб ҳисобланиши маълум қилинди.

«Илтимос, тушуниб етишингизни сўрайман: бу чоралар мавжуд савдо тўсиқларини бартараф этиш учун зарур. Савдо мувозанатининг бузилиши нафақат иқтисодиётимизга, балки миллий хавфсизлигимизга ҳам жиддий таҳдид солади», — деди Дональд Трамп.