Тошкент, Ўзбекистон (UzDaily.uz) — 2025 йил 29 январь куни Туркия Республикасининг Анқара шаҳрида Ўзбекистон, Озарбайжон ва Туркия ташқи ишлар, иқтисодиёт/савдо ва транспорт вазирларининг иккинчи уч томонлама учрашуви бўлиб ўтди.

Йиғилишда Ўзбекистон Республикаси транспорт вазири Илҳом Маҳкамов иштирок этди. Кун тартибидаги асосий масалалардан бири ташқи сиёсат, минтақавий ҳамкорлик ва транспорт коммуникацияларини ривожлантириш масалалари бўлди.

Учрашувда савдо-иқтисодий ва инвестициявий алоқаларни мустаҳкамлаш, шунингдек, минтақа транспорт тармоқларини янада ривожлантириш истиқболлари муҳокама қилинди. Вазирлар ўзаро товар етказиб беришни осонлаштириш ва давлатлар ўртасида товарлар ва одамларнинг ҳаракатланишини таъминлаш учун ягона ва самарали транспорт инфратузилмасини яратиш муҳимлигини таъкидладилар.

Йиғилиш натижасида Анқара декларацияси имзоланди. Бу ҳужжат транспорт соҳасида ҳамкорликни кучайтириш ва минтақавий алоқаларни кенгайтиришга қаратилган комплекс чора-тадбирлар режасини белгилайди.

Анқарадаги учрашув уч давлат ўртасидаги интеграцияни чуқурлаштириш ва минтақавий транспорт ҳамда савдо алоқаларини барқарор ривожлантириш йўлида муҳим қадам бўлди.