Тошкент, Ўзбекистон (UzDaily.uz) — 13 июль куни Андижон туманида жойлашган аҳоли пунктларидан бирида содир бўлган ҳодиса натижасида 4 ёшли қизалоқнинг юзи куйган. Бу ҳақда Андижон вилояти «Ҳудудий электр тармоқлари» матбуот хизмати хабар берди.

Мавжуд маълумотларга кўра, бола кўп квартирали уйнинг ҳовлисида бўлган вақтда унинг мушуги 35/0,4 кВ кучланишга ва 1000 кВА қувватга эга бўлган трансформатор подстанцияси жойлашган ертўлага югуриб кирган. Ҳайвон ишлаб турган трансформатор ичига кириб кетган ва бу қисқа туташувга сабаб бўлган.

Қизалоқ ертўла эшиги орқали содир бўлаётган воқеани кузатиб турган пайтда авария содир бўлиб, унинг юзида куйиш жароҳатлари юзага келган. Унга зудлик билан биринчи тиббий ёрдам кўрсатилган ва шундан сўнг касалхонага етказилган. Охирги маълумотларга кўра, унинг аҳволи барқарор деб баҳоланмоқда.

Ҳодиса юзасидан энергетика компанияси мутахассислари томонидан хизмат текшируви олиб борилмоқда.