Тошкент, Ўзбекистон (UzDaily.uz) — Андижон вилоятининг Асака туманидаги хусусий уйда эр-хотин ис газидан заҳарланиш белгилари билан вафот этган ҳолда топилди.

Туман ҳокимлиги матбуот хизмати маълумотига кўра, фожиа 7 декабрь куни содир бўлган. 39 ёшли эркак ва 38 ёшли аёл ис газидан заҳарланиб ҳаётдан кўз юмган.

Тахминан соат 9:20 да эр-хотин ўз уйларида ис газидан заҳарланиш белгилари билан топилган. Уй ўз қўллари билан ясалган кўмир печи ёрдамида иситилгани аниқланган.

Ўлим сабабларини аниқлаш учун суд-тиббий экспертиза тайинланган. Асака тумани прокуратураси томонидан дастлабки тергов ишлари олиб борилаётгани туман ҳокимлиги матбуот хизмати томонидан маълум қилинди.