Андижон вилояти ҳокими хитойлик инвестор билан транспорт ва шаҳар инфратузилмасини ривожлантириш масалаларини муҳокама қилди

Тошкент, Ўзбекистон (UzDaily.uz) — 4 февраль куни Андижон вилояти ҳокими Шуҳратбек Абдурахмонов Бобур шаҳрида Хитой инвестори Ма Цзайшэн, «Xaynan Stzintanbo Investment» ҳамда «Xaynan Chjyondjun Tanbo Lishan Industry» компаниялари бошқарув кенгаши раиси билан ишчи учрашув ўтказди.

Бир неча кун аввал томонлар икки томонлама ҳамкорлик истиқболларини муҳокама қилиш учун учрашган, мазкур учрашув ушбу мулоқотнинг мантиқий давоми бўлди.

Музокаралар давомида вилоятдаги асосий инфратузилмавий лойиҳаларни ривожлантириш масалалари атрофлича кўриб чиқилди.

Асосий эътибор Хонободда «Қуруқ порт» логистика марказини қуриш, транспорт-логистика тармоғини ривожлантириш, автомобиль йўлларини барпо этиш, сунъий кўл яратиш, шунингдек Бобур шаҳри шаҳар инфратузилмасини комплекс равишда яхшилаш масалаларига қаратилди.

4 февраль куни бўлиб ўтган учрашувда вилоят ҳокими ва инвестор таклиф этилаётган лойиҳаларнинг техник-иқтисодий кўрсаткичлари, инвестиция ҳажмлари, уларни амалга ошириш босқичлари ҳамда ўзаро манфаатли ҳамкорлик шартлари юзасидан фикр алмашдилар.

Учрашув якунларига кўра белгиланган лойиҳаларни амалга ошириш бўйича аниқ келишувларга эришилди, шунингдек Андижон вилоятини комплекс ривожлантириш ва шериклик муносабатларини мустаҳкамлашга қаратилган ҳамкорлик меморандумлари имзоланди.