Alif Uzbekistan КЎБ учун банк тузишни режалаштирмоқда

Тошкент, Ўзбекистон (UzDaily.uz) — Alif Uzbekistan йирик инвестициялар жалб этмоқда ва кичик ҳамда ўрта бизнесни қўллаб-қувватлаш учун банк ташкил этишни режалаштирмоқда, дея хабар берди компания ўзининг ижтимоий тармоқларида.

Муддатли тўлов, e-commerce ва финтех йўналишларидаги етакчилардан бири ҳисобланган Alif Uzbekistan банк лицензиясини олиш ниятида. Ҳозирда компания фақат тўлов хизматлари лицензиясига эга.

2014 йилда асос солинган Alif тез орада Марказий Осиёдаги етакчи финтех компаниялардан бирига айланди. Бугун компания Ўзбекистон, Тожикистон ва Покистонда фаолият юритиб, 1 400 дан ортиқ ходимга ва 4,4 миллион мижозга эга.

Ўзбекистонда Alif ўз фаолиятини 2019 йилда бошлаган, 2020 йилда эса электрон пул ва тўловлар лицензиясини олган. Компания муддатли тўлов хизматлари, маркетплейс, тўлов платформаси ва Alif Travel хизматини йўлга қўйди.

Айни пайтда Alif 5 миллиондан зиёд фойдаланувчига эга, рассрочка бозоридаги улуши 30%дан ортиқ, тўлов хизмати йилига 135 млрд сўмлик даромад келтирмоқда, маркетплейс эса ҳар ой 2 млн АҚШ долларидан зиёд айланмани кўрсатмоқда.