ALFA-BANK Ўзбекистон чарм-пойабзал саноати билан ҳамкорликка қизиқиш билдирди

Тошкент, Ўзбекистон (UzDaily.uz) — «Ўзчармсаноат» уюшмаси ҳамда Россия Федерациясининг «ALFA-BANK» банки Ташқи иқтисодий фаолият дирекцияси ўртасида учрашув бўлиб ўтди.

Суҳбат давомида чарм-пойабзал соҳасида олиб борилаётган ислоҳотлар, инвесторлар учун яратилган қулай муҳит, имтиёз ва преференциялар ҳақида батафсил маълумот берилди.

Учрашувда «ALFA-BANK» вакиллари бугунги кунда банкнинг 1,5 миллионга яқин мижозлари мавжудлигини, шулардан қарийб 5 минг нафари чарм-пойабзал ва мўйна йўналишида фаолият юритаётганини таъкидлади. Шунингдек, Россия бозорида Ўзбекистонда ишлаб чиқарилган маҳсулотларга қизиқиш ортиб бораётгани қайд этилди.

Банк томони инвесторларни жалб этиш, қўшма лойиҳаларни амалга ошириш, божхона, сертификатлаштириш ва логистика масалаларида амалий ёрдам кўрсатишга тайёрлигини билдирди.

Учрашув якунида «ALFA-BANK» делегацияси Тошкентда бўлиб ўтадиган “UzCharmExpo EurAsia – 2025” халқаро кўргазмасида иштирок этиш ниятини билдирди.