Ajinomoto Ўзбекистонда ишлаб чиқаришни ташкил этиш имкониятларини кўриб чиқмоқда

Тошкент, Ўзбекистон (UzDaily.uz) — 11 сентябрь куни ИССВ раҳбари Лазиз Кудратов Япониянинг етакчи Ajinomoto компанияси делегацияси, жумладан, компания катта вице-президенти ва ижрочи директори Масаи Ёшитеру билан учрашди.

1909 йилда ташкил этилган ва бош қароргоҳи Токиода жойлашган Ajinomotо озиқ-овқат маҳсулотлари, озиқавий қўшимчалар, кимё саноати маҳсулотлари, фармацевтика ва косметика ишлаб чиқаришга ихтисослашган йирик халқаро корпорациядир.

Компания таркибида 65 дан ортиқ корхона фаолият юритади, умумий активлари 9,6 миллиард АҚШ долларини ташкил этади, йиллик айланмаси эса 10 миллиард АҚШ долларига етади. Бугунги кунда компанияда 33,4 мингдан ортиқ ходим ишламоқда.

Музокаралар чоғида Ajinomoto компаниясининг Ўзбекистон бозорига кириб келиш истиқболлари муҳокама қилинди. Мулоқот жараёнида мамлакатимизда юқори сифатли озиқавий қўшимчаларни ишлаб чиқариш ва тарқатишни ташкил этиш масалалари конструктив тарзда кўриб чиқилди.

Учрашув якунида томонлар Ajinomoto билан ҳамкорликнинг Ўзбекистон озиқ-овқат саноатини ривожлантириш ва маҳаллийлаштириш даражасини оширишдаги стратегик аҳамиятини қайд этиб, лойиҳани муваффақиятли амалга ошириш бўйича навбатдаги чораларни белгилаб олдилар.