Тошкент, Ўзбекистон (UzDaily.uz) — Вазирлар Маҳкамаси ҳузуридаги Техник тартибга солиш агентлиги мамлакатда енгил автомобилларнинг ишлаб чиқарувчилари ва расмий дилерлари рўйхатини тасдиқлади.

Агентликнинг ҳукумат порталидаги саҳифасида жойлаштирилган мазкур рўйхат 18 та компанияни ўз ичига олади. Улардан олтитаси тўғридан-тўғри автомобиль ишлаб чиқариш билан шуғулланса, қолганлари хорижий маркаларнинг расмий импортчилари сифатида фаолият юритади.

Ишлаб чиқарувчилар ва расмий дилерлар қаторида UzAuto Motors (Chevrolet: Damas, Equinox, Lacetti, Tracker, Traverse), ADM Jizzakh (Haval, Kia, Lada), Asaka Motors International (Hyundai, Shineray), BYD Uzbekistan Factory (BYD), Жиззах автомобиль заводи (Volkswagen), Самарқанд автомобиль заводи (SAZ), Avtocapital (Mercedes-Benz) каби йирик компаниялар бор.

Рўйхатда, шунингдек, премиум тоифадаги брендларнинг расмий вакиллари ҳам кўрсатилган. Улар орасида Porsche (Orbis Cars Premium), BMW (Premium Auto), шунингдек, Evolution Motors, E-Go Motors, Evolux Auto, Leapmotor ва JAC Auto каби электромобил ва гибрид автомобиллар билан шуғулланувчи янги компаниялар ҳам мавжуд.

Техник тартибга солиш агентлиги порталининг махсус бўлимида эълон қилинган тўлиқ рўйхат оммавий моделлардан тортиб премиум тоифадаги автомобилларгача, шунингдек, электромобил ва гибрид транспорт воситаларини қамраб олган.