Тошкент, Ўзбекистон (UzDaily.uz) — Айни кунларда Ўзбекистон Савдо-саноат палатаси раиси Даврон Вахабов амалий ташриф билан Афғонистонда бўлиб турибди.

Ташриф доирасида Spinzar Cotton Company компаниясининг ишлаб чиқариш жараёнлари, қувватлари ва маҳсулот турлари билан яқиндан танишилди.

Spinzar Cotton Company — Афғонистоннинг энг қадимий тўқимачилик компанияларидан бири бўлиб, 1920-йилларда Қундуз вилоятида ташкил этилган. Компания кунлик 30 тонна ёғ ва 100 000 дона совун ишлаб чиқариш салоҳиятига эга бўлиб, маҳаллий иқтисодиёт ривожига ҳамда янги иш ўринлари яратилишига катта ҳисса қўшиб келмоқда.

Учрашув чоғида пахтачилик ва тўқимачилик соҳасида кооперацияни йўлга қўйиш, маҳсулот етказиб бериш ҳамда қўшма лойиҳаларни амалга ошириш имкониятлари муҳокама қилинди.

Томонлар ўзаро манфаатли ҳамкорликни ривожлантириш борасида келишувга эришиб, келгусида пахта хомашёсини қайта ишлаш ва экспорт салоҳиятини ошириш бўйича қўшма ташаббусларни амалга оширишга тайёр эканликларини билдирдилар.

Ушбу ҳамкорлик Ўзбекистон ва Афғонистон тадбиркорлари учун янги истиқболлар очиб, икки давлат ўртасидаги савдо-иқтисодий алоқаларни янада мустаҳкамлашга хизмат қилади.