Тошкент, Ўзбекистон (UzDaily.uz) — Ўзбекистон Савдо-саноат палатаси раиси Даврон Вахабов Афғонистоннинг Баглан вилоятидаги Nasaji Textile Factory тўқимачилик фабрикасига ташриф буюрди. Ташриф давомида қўшма кооперация, экспорт ва импорт масалалари муҳокама қилинди.

Nasaji Textile Factory – Афғонистоннинг энг йирик ва қадимий тўқимачилик корхоналаридан бири бўлиб, пахтадан ип-калава, газламалар ва тайёр маҳсулотлар ишлаб чиқаради. Айни пайтда фабрикада 350 дан ортиқ ходим ишламоқда ва ишлаб чиқариш ҳажми босқичма-босқич оширилмоқда. Фабрика маҳаллий бозор билан бирга халқаро экспортга ҳам йўналтирилган.

Учрашув давомида фабрика билан қўшма кооперация йўлга қўйилиши, ўзаро тажриба алмашиш ва ишлаб чиқариш ҳажмини ошириш имкониятлари муҳокама қилинди.

Тайёр ва ярим тайёр тўқимачилик маҳсулотларини экспорт қилиш, шунингдек, пахта толаси ва ип-калавани Ўзбекистонга импорт қилиш юзасидан келишувга эришилди.

Ташриф натижалари тўқимачилик саноатида янги истиқболларни очишга, экспорт ва импорт жараёнларини ривожлантиришга хизмат қилади.