Тошкент, Ўзбекистон (UzDaily.uz) — Саудия Арабистонининг “Acwa Power” компанияси минтақавий директори Жон Заиди, ушбу компаниянинг стратегик пудратчиси – Ҳиндистоннинг “L&T Construction” компанияси МДҲ давлатлари бўйича раҳбари Раджан Бансал бошчилигидаги делегация «Uzelectroapparat-electroshield» ва Технопарк корхоналарига ташриф буюрди.

Ташрифдан асосий мақсад – Ўзбекистон ҳудудларида “Acwa Power” инвестициялари ҳисобидан қурилиши режалаштирилган қуёш электр станциялари лойиҳалари доирасида, “L&T Construction” томонидан амалга ошириладиган қурилиш-монтаж ишлари учун зарур бўлган кабель-сим маҳсулотлари, кучланиш қурилмалари, металл-каркас, совутиш тизимлари ва бошқа электротехника жиҳозларини маҳаллий ишлаб чиқарувчилардан етказиб бериш имкониятларини ўрганишдан иборат бўлди.

Делегация вакиллари мазкур корхоналар ишлаб чиқариш майдонлари, технологик линиялари, маҳсулот сифати, халқаро стандартларга мувофиқлик ва экспорт салоҳияти билан яқиндан танишдилар.

Шунингдек, томонлар ўзаро техник талаблар, ҳамкорлик шартлари ҳамда эҳтимолий келишувлар юзасидан фикр алмашдилар.

Мазкур ташриф Ўзбекистон электротехника маҳсулотларини халқаро энергетика лойиҳаларига интеграция қилиш, маҳаллий ишлаб чиқарувчиларнинг “яшил энергетика” соҳасидаги глобал лойиҳаларда иштирокини таъминлашда муҳим аҳамият касб этади.