Абдуқодир Ҳусанов Осиёнинг 2025 йилдаги энг яхши ёш футболчиси деб топилди

Тошкент, Ўзбекистон (UzDaily.uz) — Ўзбекистон миллий терма жамоаси ва Англиянинг «Манчестер Сити» клуби марказий ҳимоячиси Абдуқодир Ҳусанов Goalpost томонидан 2025-йилнинг энг яхши ёш ўйинчиси деб топилди.

Ўтган йил 21 ёшли футболчи учун муҳим ва тарихий йил бўлди.

Январь ойида Ҳусанов «Манчестер Сити» клубига ўтганидан сўнг Англия Премьер-лигасида дебют қилган Ўзбекистон тарихидаги илк футболчига айланиб, тарихга кирди.

Июнь ойида у Ўзбекистон терма жамоаси сафида миллий жамоанинг жаҳон чемпионатига йўлланма олишини таъминлади. Жорий мавсумда ҳимоячи «шаҳарликлар» сафида тўққизта ўйинда майдонга тушди.

Goalpost овоз беришида Ҳусанов Осиёнинг қатор истиқболли футболчиларини ортда қолдирди. Улар орасида Аббос Файзуллаев («Истанбул Башакшехир», Ўзбекистон), Нестори Иранкунда («Уотфорд», Австралия), Марселино Фердинан («Оксфорд Юнайтед», Индонезия), Ли Хана Бом («Мидтьюлланд», Корея Республикаси), Али Жасим («Комо» / «Ал-Наджма», Ироқ), шунингдек Япония, Корея ва Австралия вакиллари бор.

Шунингдек, Ҳусанов The Athletic нашри тузган дунёнинг энг кучли юз нафар футболчиси рейтингида 86-ўринни эгаллади.