Абдуқодир Ҳусанов АПЛдаги «Манчестер Сити» — «Брайтон» ўйинининг энг яхши футболчиси деб топилди

Тошкент, Ўзбекистон (UzDaily.uz) — Англия Премьер-лигасининг 21-турида Ўзбекистон ҳимоячиси Абдуқодир Ҳусанов тўп сураётган «Манчестер Сити» ўз майдонида «Брайтон» жамоаси билан дуранг ўйнади.

Уй эгалари сафида 11-дақиқада пенальтидан Эрлинг Холанд ҳисобни очди, меҳмонлар жамоасида эса Каору Митома гол урди. Эътиборли жиҳати шундаки, Холанднинг ушбу голи АПЛ тарихидаги 35 мингинчи гол бўлди, норвегиялик ҳужумчи эса жорий мавсумдаги 20-голини киритиб, тўпурарлар пойгасида пешқадамликни қўлга олди.

Абдуқодир Ҳусанов учрашувни тўлиқ ўтказиб, «Манчестер Сити»нинг марказий ҳимоясида жуда ишончли ўйин намоён этди.

У тезлик, жисмоний куч ва ўйиндаги нафосатни муваффақиятли уйғунлаштириб, рақиб ҳужумларини самарали тарзда нейтраллаштирди ва шунинг учун учрашувнинг энг яхши футболчиси деб эътироф этилди.

Премьер-лиганинг жорий мавсумида Ҳусанов аллақачон олти ўйинда майдонга тушиб, жамоасининг чемпионатдаги позицияларини мустаҳкамлашга ҳисса қўшмоқда.