Абдулла Азизов Швейцария элчиси билан йирик фармацевтика компаниялари билан ҳамкорликни ривожлантириш масалаларини муҳокама қилди

Тошкент, Ўзбекистон (UzDaily.uz) — 2025 йил 30 сентябрь куни Фармацевтика тармоғини ривожлантириш агентлиги директори Абдулла Азизов Швейцария Конфедерациясининг Ўзбекистон Республикасидаги Фавқулодда ва Мухтор Элчиси жаноб Константин Оболенский билан учрашди.

Учрашув давомида агентлик директори "Tashkent Pharma Park” инновацион илмий-ишлаб чиқариш фармацевтика кластери лойиҳасини тақдимот қилди ва яратилган имкониятлар билан таништириш мақсадида экскурсия ўтказди.

Суҳбат чоғида Швейцариянинг йирик фармацевтика компаниялари - "Roche", "Novartis" ҳамда кўплаб кичик ва ўрта фармацевтика корхоналари тўғрисида сўз борди. Шунингдек, дори воситалари соҳасида қалбаки маҳсулотлар муомаласининг олдини олиш масаласи муҳокама қилинди.

Ўз навбатида агентлик раҳбари Ўзбекистонда бундай хавфларни камайтириш учун "Track&Trace" тизими ва "Data Matrix" орқали назорат йўлга қўйилганини, истеъмолчилар эса “PharmUz” мобил иловаси орқали қалбаки дори воситалари бўйича мурожаат қилиш имкониятига эгалигини қайд этди.

Элчи жаноблари Ўзбекистонда фармацевтика соҳасидаги ислоҳотлар ва имкониятларни юқори баҳолаб, Швейцариялик ишлаб чиқарувчилар билан ҳамкорликни йўлга қўйиш масаласида кўмакчи бўлишини маълум қилди.