21 мартдан Саудия Арабистони ҳажга тайёргарлик муносабати билан умра визалари беришни тўхтатади

Тошкент, Ўзбекистон (UzDaily.uz) — 2026 йил 21 мартдан Саудия Арабистони ҳажга тайёргарлик кўрилиши муносабати билан умра визаларини беришни вақтинча тўхтатади. Бу ҳақда Ҳаж ва умра вазирлиги расмий сайтида эълон қилинган расмий календарь жадвалида маълум қилинган.

Мавсум учун белгиланган саналарга кўра, 20 март умра визаларини олиш учун сўнгги кун ҳисобланади, 3 апрель эса хорижий зиёратчиларнинг мамлакатга кириши учун охирги муддат этиб белгиланган.

Барча зиёратчилар 18 апрелдан кечиктирмай Саудия Арабистони ҳудудини тарк этиши лозим, шундан сўнг ҳаж тугагунга қадар умра амалини бажариш вақтинча тўхтатилади.

Ҳаж ва умра вазирлиги мазкур чора-тадбирлар ҳажни хавфсиз ва тартибли ўтказишни таъминлашга қаратилганини таъкидлаб, умра мавсуми ҳаж якунланганидан сўнг қайта бошланишини маълум қилди.