2026 йилда International Cotton Day Тошкентда ўтказилади

Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёевнинг АҚШга расмий ташрифи доирасида Қишлоқ хўжалиги вазири Иброҳим Абдураҳмонов Халқаро пахта маслаҳат қўмитаси (ICAC) директори Эрик Трахтенберг билан учрашди.

Марказий Осиё мамлакатлари ва АҚШ етакчиларининг «С5+1» форматидаги саммити доирасида ўтказилган мазкур мулоқот давомида томонлар қўмита билан амалга оширилаётган ҳамкорликнинг натижалари ва келгуси режаларни муҳокама қилдилар.

Учрашув чоғида, хусусан, Ўзбекистонда пахтачилик соҳасида “сарбон бозори” тизимини жорий этишга қаратилган ҳамкорлик меморандуми имзоланди. Бу ташаббус халқаро миқёсда барқарор ишлаб чиқаришни ривожлантириш ва экологик технологияларни жорий қилишга хизмат қилади.

Шунингдек, 2026 йилда Ўзбекистонда “International Cotton Day” халқаро тадбирини ўтказиш бўйича келишувга эришилди.

Мазкур форум мамлакатда пахта етиштириш соҳасида амалга оширилаётган ислоҳотлар, инновацион ёндашувлар ва экологик барқарор ишлаб чиқариш амалиётини намоён этиш учун муҳим платформа бўлиб хизмат қилиши билан аҳамиятли.