2026 йил 1 январдан бошлаб Грузияга кирувчи барча хорижий фуқариларда тиббий суғурта бўлиши талаб қилинaди

Тошкент, Ўзбекистон (UzDaily.uz) — 2026 йил 1 январдан Грузия ҳудудида хорижий фуқарилар учун янги мажбурий талаб кучга кирди. Мамлакат ҳукумати қарорига мувофиқ, мамлакатга кирувчи ҳар бир шахс бутун истиқомат муддати давомида амал қиладиган тиббий суғуртага эга бўлиши шарт. Бу ҳақда Uzbekistan Airways авиакомпанияси хабар берди.

Суғурта полиссиз бўлиш учун 300 лари миқдорида жарима белгиланган бўлиб, бу тахминан 1,3 миллион сўмга тенг.

Суғурта полиси инглиз ёки грузин тилида тузилиши ва бутун истиқомат муддати учун суғурта ҳимоясини таъминлаши лозим. Суғурта бўйича минимал талабларга камида 5 000 АҚШ доллари миқдорида фавқулодда амбулатор даволаш харажатларини қоплаш, ҳамда 30 000 АҚШ долларигача стационар даволаш, шу жумладан, бахтсиз ҳодиса, жароҳатлар, касалликлар, эвакуация ва репатриация харажатлари кириши шарт.

Грузиянинг тоғли ҳудудларига саёҳат қилишда қўшимча суғурта талаблари амал қилади.

Ҳужжатни ўзингиз билан олиб юришингиз керак — электрон шаклда мобил қурилмангизда ёки босма шаклда. Полис мамлакатга кириш пайтида ҳамда истиқомат давомида қонуний органлар томонидан текширилиши мумкин.

Uzbekistan Airways йўловчиларга чегарани муаммосиз кесиб ўтишлари учун барча зарур ҳужжатларни олдиндан тайёрлаб олишни тавсия қилади.