2025 йилнинг 10 ойида қарийб 6,4 млн ўзбекистонлик хорижга чиқди

Тошкент, Ўзбекистон (UzDaily.uz) — 2025 йил январь–октябрь ойларида тахминан 6,4 миллион Ўзбекистон фуқароси туристик мақсадларда хорижга сафар қилди. Бу ўтган йилнинг шу даврига нисбатан 1,3 миллион нафарга ёки 24,7 фоизга кўп экани Миллий статистика қўмитаси маълумотларида қайд этилган.

Энг кўп ташриф буюрилган давлатлар орасида қўшни мамлакатлар етакчилик қилмоқда: Қирғизистонга 2,8 миллион, Қозоғистонга 1,2 миллион ва Тожикистонга 1,1 миллион фуқаро сафар қилган. Шунингдек, Россияга — 370,1 минг, Саудия Арабистонига — 237,1 минг ва Туркияга — 230,8 минг нафар сайёҳ йўл олган.

Бошқа оммабоп йўналишлар қаторидан БАА (114,1 минг турист), Миср (56,2 минг), Хитой (39,6 минг) ва Вьетнам (32,8 минг) ўрин олган.

Қолган давлатларга жами 204,1 минг ўзбекистонлик ташриф буюрган.