2025 йилда Ўзбекистонда ЙТҲ оқибатида 2 188 киши ҳалок бўлди — ИИВ маълумоти

Тошкент, Ўзбекистон (UzDaily.uz) — Ўзбекистонда 2025 йилда йўл-транспорт ҳодисалари натижасида 2 188 киши ҳалок бўлган, деб хабар қилди Ички ишлар вазирлиги ҳузуридаги Йўл ҳаракати хавфсизлиги хизмати матбуот хизмати.

2024 йил билан таққослаганда кўрсаткич пасайган: ўшанда мамлакат йўлларида 2 199 киши ҳалок бўлган эди.

2025 йилда 8 901 киши турли даражадаги жароҳатлар олган (2024 йилда — 8 931 киши).

Сўнгги беш йил (2021–2025) таҳлили аҳоли сони ва транспорт воситалари миқдори ошиб бораётганига қарамасдан, ЙТҲлар сони барқарор равишда камайиб бораётганини кўрсатмоқда.

Аҳоли сони 2021 йилдаги 35,27 миллион нафардан 2025 йилда 38,23 миллион нафаргача ошган, транспорт воситалари сони эса 3,82 миллиондан 5,53 миллионтага етган.

Ушбу давр мобайнида 100 минг аҳолига тўғри келадиган ЙТҲда ҳалок бўлганлар сони 6,9 тадан 5,7 тагача, ҳар 10 минг транспорт воситасига тўғри келадиган кўрсаткич эса 6,3 тадан 4,0 тагача камайган.

Болалар иштирокидаги ЙТҲлар сони 2024 йилга нисбатан 171 тага (–9,6%) камайган, ҳалок бўлган болалар сони эса 36 нафарга (–12,8%) қисқарган.