Тошкент, Ўзбекистон (UzDaily.uz) — Статистика агентлиги маълумотларига кўра, 2024 йилда Ўзбекистон 53,5 минг тонна магиз экспорт қилиб, умумий экспорт ҳажми 79,5 миллион АҚШ долларини ташкил этди. Бу ўз навбатида, ўзбек маҳсулотларига халқаро бозорда юқори талаб мавжудлигини ва мамлакатнинг қуритилган узум ишлаб чиқариш ҳамда экспорт қилишда йирик ўрин эгаллаб бораётганини тасдиқлайди.

Энг кўп магиз Хитойга — 8 649 тонна ва Туркияга — 8 532 тонна етказиб берилган. Қозоғистон (7 147 тонна) ва Россия (3 753 тонна) ҳам етакчи ҳамкорлар қаторига кирган. Бирлашган Араб Амирликларига 3 492 тонна экспорт қилинган бўлса, қолган 21 925 тонна маҳсулот бошқа давлатларга юборилган.

Экспорт ҳажмининг ўсиши ўзбек магизига бўлган қизиқишнинг ошиб бораётганини кўрсатади. Маҳсулотнинг юқори сифати ва ўзига хос таъм хусусиятлари уни жаҳон бозорида тобора талабгир маҳсулотга айлантирмоқда.

2025 йилда ҳам бу тенденция давом этиши, янги бозорларга чиқиш ва ишлаб чиқариш ҳажмини ошириш орқали экспорт ҳажмининг ўсиши кутилаётгани таъкидланмоқда.