1-февралдан бошлаб Тошкент метросининг 19 та бекатидаги чипта кассалари ёпилади

Тошкент, Ўзбекистон (UzDaily.uz) — 1-февралдан бошлаб Тошкент метросининг яна 19 та бекатидаги чипта кассалари ёпилади. Бу ҳақда «Тошкент метрополитени» ДУК хабар қилди.

Улар қаторига «Янгиҳаёт», «Сергели», «Ўзгариш», «Чоштепа», «Миллий боғ», «Мустақиллик майдони», «Амир Темур хиёбони», «Пушкин», «Дўстлик», «Авиасозлар», «Тошкент», «Ойбек», «Космонавтлар», «Ўзбекистон», «Ғофур Ғулом», «Чорсу», «Туркистон», «Шаҳристон» ва «Бодомзор» бекатлари киради.

Бекатларда бир марталик QR-билетларни бериш учун инфокиосклар ўрнатилади.

Йўловчилар учун ўндан ортиқ тўлов усуллари мавжуд. Улар орасида банк ва транспорт карталари, юзни таниб олиш тизими (Face ID), кафт орқали тўлов (PalmPay) ҳамда мобил иловалар бор.

Кассаларнинг ёпилиши чипта харид қилиш жараёнини тезлаштириш ва йўл ҳақини тўлашни соддалаштириш имконини беради. Йўловчилар фикрларини инобатга олган ҳолда, қолган бекатларда ҳам кассаларни босқичма-босқич ёпиш режалаштирилган.

Аввалроқ, 2025 йил 9 декабрда метронинг 16 та бекатида кассалар ёпилган эди. Кассир лавозимлари тугатилади, ходимларга эса бухгалтерия, тикувчилик ва қандолатчилик йўналишларини ўз ичига олган турли соҳалар бўйича бепул қайта тайёрлаш курслари таклиф этилади.