YeTTB O‘zbekistonda infratuzilma, raqamlashtirish va suv resurslarini boshqarish bo‘yicha loyihalarni moliyalashtirishni rejalashtirmoqda

Toshkent, O‘zbekiston (UzDaily.uz) — Shu yilning 26-sentabr kuni O‘zbekiston Respublikasi Investitsiyalar, sanoat va savdo vazirligida Vazir Laziz Kudratov Yevropa Tiklanish va Taraqqiyot Banki (YeTTB)ning Barqaror infratuzilma guruhi bo‘yicha boshqaruvchi direktori Garri Boyd-Karpenter boshchiligidagi delegatsiya bilan uchrashdi.

Bugungi kunda YeTTBning O‘zbekistondagi portfeli umumiy qiymati 5,8 milliard yevroga teng bo‘lgan 185 ta loyiha va dasturdan iborat. Muzokaralarda energetika, transport, raqamlashtirish, shahar infratuzilmasini rivojlantirish va suv xo‘jaligi kabi yo‘nalishlarda yangi loyihalar ko‘rib chiqildi.

Tomonlar kelgusidagi hamkorlik ustuvor yo‘nalishlarini belgilab oldilar: xususan, ijtimoiy ahamiyatga ega sohalarda davlat-xususiy sheriklik mexanizmlariga urg‘u bergan holda, suveren bo‘lmagan portfelni kengaytirish hamda investitsion loyihalarda texnik yordam, institutsional rivojlanish, raqamlashtirish va barqaror boshqaruv kabi “yumshoq” komponentlarni qo‘llab-quvvatlash uchun grant mablag‘larini oshirish.