TBC Bank milliy valyutadagi obligatsiyalarning uchinchi seriyasini muvaffaqiyatli joylashtirdi

Toshkent, O‘zbekiston (UzDaily.uz) — Mamlakatdagi yirik raqamli banklardan biri va London fond birjasida ro‘yxatdan o‘tgan TBC Bank Group tarkibiga kiruvchi TBC Bank, 49,6 mlrd so‘mlik milliy valyutadagi obligatsiyalarni muvaffaqiyatli joylashtirganini e’lon qiladi. TBC Capital bitim bo‘yicha maslahatchi bo‘lgan bo‘lsa, joylashtirishning tashkilotchisi Toshkentdagi ALKES investitsiya-konsalting kompaniyasi bo‘ldi.

19% daromadlilikka ega ikki yillik obligatsiyalarning joylashtirilishi O‘zbekiston ichki qarz kapitali bozorini rivojlantirish yo‘lidagi muhim qadamdir. Ushbu emissiya mamlakat obligatsiya bozorining tobora yetuklashib borayotganini ko‘rsatib, mahalliy emitentlar uchun moliyalashtirish manbalarini kengaytiradi, shuningdek, eng jadal rivojlanayotgan frontir bozorlardan biriga kirishga intilayotgan xalqaro investorlar uchun yangi imkoniyatlar yaratadi. Mazkur joylashtirish TBC Bankning moliyalashtirish manbalarini diversifikatsiya qilish strategiyasi doirasidagi navbatdagi bosqich bo‘lib, shu bilan birga mamlakat moliya bozori infratuzilmasini rivojlantirishga ham xizmat qiladi.

Mazkur bitim TBC Capital’ning Toshkent fond birjasi bilan hamkorlik qilayotgan ilk xalqaro investitsiya vositachisi sifatidagi mavqeini mustahkamlaydi hamda uning O‘zbekiston moliya bozorini rivojlantirishdagi faol ishtirokini tasdiqlaydi. Yangi obligatsiya emissiyasi mamlakatning xalqaro investorlar uchun ochiqligi ortib borayotganini, shuningdek, ichki kapital bozorining rivojlanishi, kengayishi va institutsional jihatdan mustahkamlanayotganini yaqqol ko‘rsatadi.

Nika Kurdiani, CEO TBC Uzbekistan: “Milliy valyutadagi obligatsiyalarning muvaffaqiyatli joylashtirilishi TBC Bankning O‘zbekistondagi moliyalashtirish manbalarini diversifikatsiya qilish hamda mahalliy kapital bozorini rivojlantirishni qo‘llab-quvvatlash yo‘lidagi navbatdagi qadamdir. Ushbu bitim O‘zbekistonning investorlar uchun tobora jozibador bo‘lib borayotganini, shuningdek, transchegaraviy investitsiyalarni rivojlantirish va mamlakat moliyaviy infratuzilmasini mustahkamlashga boʻlgan doimiy intilishimizni namoyish etadi”.

Otar Sharikadze, CEO TBC Capital: “Mazkur bitimni tashkil etishda O‘zbekistondagi TBC Bankni qo‘llab-quvvatlash imkoniyatini yuqori baholaymiz. O‘tgan yili amalga oshirilgan bir yillik obligatsiyalarning muvaffaqiyatli joylashtirilishi joriy emissiya uchun mustahkam asos bo‘lib xizmat qildi. Ushbu yangi joylashtiruv xalqaro investorlarning bankka bo‘lgan ishonchi ortib borayotganini tasdiqlaydi hamda milliy valyutadagi ichki kapital bozorining tobora mustahkamlanib borayotganidan dalolat beradi. Toshkent fond birjasi bilan hamkorlik qilayotgan ilk xalqaro investitsiya vositachisi sifatida TBC Capital O‘zbekistonga xalqaro investitsiyalar oqimining barqaror o‘sayotganini qayd etadi va mamlakat moliya bozorining keyingi rivoji va chuqurlashuvi jarayonida emitentlar hamda investorlarni qo‘llab-quvvatlashga doimiy tayyor ekanini bildiradi”.