Oʻzbekiston va Rossiya idoralararo yigʻilishda migratsiya siyosatini muhokama qilishdi

Toshkent, O‘zbekiston (UzDaily.uz) — 2026 yilning 24–25 mart kunlari O‘zbekiston Respublikasi Bosh prokuraturasida migratsiya sohasidagi vaziyatni o‘rganish bo‘yicha O‘zbekiston–Rossiya idoralararo ishchi guruhining ikkinchi yig‘ilishi bo‘lib o‘tdi.

Yig‘ilishda O‘zbekiston Respublikasi va Rossiya Federatsiyasi vazirlik va idoralarining rasmiy delegatsiyalari ishtirok etdi.

Yig‘ilishni O‘zbekiston Bosh prokurori o‘rinbosari D. Kasimov va Rossiya Bosh prokurori o‘rinbosari P. Gorodov olib bordi.

Tadbir davomida bugungi kundagi migratsiya holatiga oid masalalar, birgalikda yechim topishni talab etuvchi muammoli jihatlar atroflicha muhokama qilindi.

Tomonlar har ikki davlat manfaatlarini hisobga olgan holda migratsiya sohasida qonun ustuvorligini taʼminlashga qaratilgan kompleks chora-tadbirlarni ishlab chiqish zarurligini taʼkidladilar.

Yig‘ilishda quyidagi asosiy masalalar muhokama qilindi:

• har ikki davlat qonunlari doirasida chet el fuqarolarining huquqlarini himoya qilish;

• Rossiya Federatsiyasida istiqomat qiluvchi fuqarolar tomonidan mehnat qonunchiligiga rioya qilish;

• migratsiya jarayonlari sharoitida ekstremizm va terrorizmga qarshi kurashish chora-tadbirlari;

• shartnoma bazasini kengaytirish va migratsiya siyosatida ikki tomonlama hamkorlikni chuqurlashtirish;

• migratsiya jarayonlarining shaffofligini oshirish va mehnat migrantlari uchun sharoitlarni yaxshilash maqsadida axborot almashinuvi.

Uchrashuv ishtirokchilari migratsiya masalalarini samarali hal etish va fuqarolar huquqlarini himoya qilish uchun ikki tomonlama munosabatlarni yana-da mustahkamlash hamda ikki mamlakat davlat organlari o‘rtasidagi muvofiqlashtirishni kuchaytirish muhimligini taʼkidladilar.

Ushbu hamkorlik doirasida O‘zbekiston Respublikasi va Rossiya Federatsiyasi Bosh prokuraturalari mehnatga kelayotgan ikki davlat fuqarolarining huquqlari ustidan nazorat va monitoringni kuchaytirish majburiyatini oldilar.