O‘zbekistonda xususiy sektorda ishlovchi barcha ayollar ham dekret puli oladi

Toshkent, O‘zbekiston (UzDaily.uz) — Endilikda xususiy sektorda faoliyat yurituvchi barcha ayollar — sotuvchilar, tozalovchilar, go‘zallik salonlari ustalari va boshqalar — homiladorlik va tug‘ruq bo‘yicha nafaqa oladi.

Senat maʼlumotlariga ko‘ra, agar 2024 yilda 133 mingga yaqin ayollarga tug‘ruq nafaqalari to‘lab berilgan, shundan faqat 15 mingdan ko‘prog‘i xususiy sektorda ishlovchi ayollar hissasiga to‘g‘ri kelgan.

Shu bilan birga, mutaxassislar bahosicha, har yili xususiy sektorda kamida 150–160 ming ayol homiladorlik va tug‘ruq taʼtiliga chiqadi.

Yangi qabul qilingan «Davlat ijtimoiy sug‘urtasi to‘g‘risida»gi Qonunga muvofiq, ijtimoiy to‘lovlar tizimi endilikda ish joyining mulk shaklidan qatʼi nazar, barcha ishlovchi ayollarni to‘liq qamrab oladi.

Bu qaror barcha mehnat faoliyati bilan shug‘ullanuvchi toifalar uchun teng ijtimoiy kafolatlarni taʼminlash hamda O‘zbekistonda ona va bola muhofazasi tizimini mustahkamlashga qaratilgan.