O‘zbekiston Zangezur transport koridorini qo‘llab-quvvatlaydi

Toshkent, O‘zbekiston (UzDaily.uz) — O‘zbekiston Zangezur koridorini yaratish tashabbusini qo‘llab-quvvatlashga tayyor bo‘lgan ilk davlatlardan biri hisoblanadi. Bu haqda XIII Global Baku Forumda O‘zbekiston Prezidentining tashqi siyosat masalalari bo‘yicha maslahatchisi Abdulaziz Kamilov maʼlum qildi.

Uning so‘zlariga ko‘ra, mazkur loyiha nafaqat xavfsizlikni taʼminlash vositasi sifatida, balki mintaqaviy hamkor davlatlarning raqobatbardoshligini oshirishga xizmat qiladigan strategik omil sifatida ham ko‘rib chiqilmoqda.

Kamilov taʼkidlashicha, O‘zbekiston Sharqiy Osiyo, Yaqin Sharq va Yevropa mamlakatlari o‘rtasida o‘zaro bog‘liqlikni taʼminlaydigan transport yo‘nalishlarini o‘z ichiga olgan ko‘p bosqichli hamkorlik tizimini shakllantirish tarafdori hisoblanadi.

Uning fikricha, ushbu yo‘nalishlarni integratsiya qilish butun mintaqa uchun iqtisodiy hamda transport-logistika xavfsizligini mustahkamlaydigan diversifikatsiya qilingan tizimni yaratish imkonini beradi.