O'zbekiston va Islom hamkorlik tashkiloti yangi turizm tashabbuslari bo'yicha kelishib oldilar

Toshkent, O‘zbekiston (UzDaily.uz) — “Ipak yo‘lida turizm” 30-Toshkent xalqaro turizm yarmarkasi doirasida Islom hamkorlik tashkiloti (IHT) bosh kotibining iqtisodiy masalalar bo‘yicha o‘rinbosari Axmad Kavesa Sengendo bilan uchrashuv o‘tkazildi.

Muzokaralar davomida tomonlar IHTga a’zo davlatlarning turizm sohasidagi hamkorligini yanada kengaytirish, jumladan, O‘zbekistonning islom merosi va ziyorat turizmini targ‘ib qilish bo‘yicha tashabbuslarini qo‘llab-quvvatlash, turizm sohasida kadrlar tayyorlash sifatini oshirish, shuningdek, tegishli idoralar o‘rtasida qo‘shma ta’lim dasturlarini yaratish va tajriba almashish masalalarini muhokama qildilar.

Axmad Kavesa Sengendo O‘zbekistonning Xalqaro turizm haftaligi va ilk bor o‘tkazilgan IHT turizm forumini muvaffaqiyatli tashkil etish borasidagi sa’y-harakatlarini yuqori baholab, mamlakatimizning Tashkilot doirasidagi hamkorlikni mustahkamlashdagi o‘rni ortib borayotganini ta’kidladi.

Tomonlar sayyohlik almashinuvini mustahkamlash, islom madaniy merosini targ‘ib qilish, iqtisodiyot va turizm sohalarida davlatlararo aloqalarni kengaytirishga qaratilgan yangi tashabbuslarni ilgari surishga o‘zaro tayyor ekanliklarini tasdiqladilar.