O‘zbekiston Markaziy banki veb-saytlardagi qoidabuzarliklar uchun 18 ta bankka jarimaga tortdi

Toshkent, O‘zbekiston (UzDaily.uz) — O‘zbekiston Respublikasi Markaziy banki joriy yil sentyabr–oktyabr oylarida tijorat banklarining rasmiy veb-saytlariga monitoring o‘tkazdi. Monitoringning maqsadi — bank xizmatlaridan foydalanuvchilarning to‘liq, ishonchli va teng darajada axborot olish huquqini qo‘llab-quvvatlashdir.

Monitoring natijalariga ko‘ra,ayrim veb-saytlarda isteʼmolchi uchun zarur bo‘lgan maʼlumotlar yetarli darajada berilmagani aniqlandi.

Xususan, ayrim banklar “O‘zbekiston Respublikasining davlat tili to‘g‘risida”gi Qonun talablariga rioya qilmayotgani maʼlum bo‘ldi — ularning rasmiy veb-saytlarida davlat tilidagi maʼlumot yo‘q edi.

Shuningdek, garov mulkini kredit qarzi kamayishi bilan bosqichma-bosqich chiqarish tartibi eʼlon qilinmagani bilan bog‘liq kamchiliklar aniqlandi. Bu axborotni oshkor etishga oid qonunchilik talablarining buzilishi hisoblanadi.

Qonunbuzarlik holatlari quyidagi banklarning rasmiy veb-saytlarida qayd etildi:

Agrobank, Anor Bank, Hayot Bank, Universal Bank, Garant Bank, Asakabank, Turonbank, Infinbank, Mikrokreditbank, Trastbank, Madad Invest Bank, Soderot Bank, Orient Finans Bank, Ipoteka-bank, Tenge Bank, Ziraat Bank Uzbekistan, AVO Bank va Open Bank.

Tekshiruv yakunlariga ko‘ra, Markaziy bank amaldagi meʼyoriy hujjatlarga muvofiq har bir bankka 102 million so‘m miqdorida jarima sanksiyasini qo‘lladi. Shu bilan birga, ularga aniqlangan kamchiliklarni bartaraf etish va rasmiy veb-saytlardagi maʼlumotlarni qonunchilik talablariga moslashtirish bo‘yicha ko‘rsatmalar yuborildi.

Markaziy bank barcha tijorat banklaridan qatʼiy ravishda talab qildi:

— isteʼmolchilar uchun axborotni oshkor etishda “O‘zbekiston Respublikasining davlat tili to‘g‘risida”gi Qonun talablariga so‘zsiz amal qilishni;

— rasmiy veb-saytlarda joylashtirilayotgan maʼlumotlarning to‘liqligi, ishonchliligi va dolzarbligini taʼminlashni;

— rasmiy resurslarda maʼlumotlar eʼlon qilinganda, isteʼmolchilarning tushunarli va to‘liq maʼlumot olish huquqini inobatga olishni.