Oʻzbekiston va Xitoy raqamli transformatsiya uchun platforma yaratadi

Toshkent, O‘zbekiston (UzDaily.uz) — Shanxay shahrida ISSV vaziri o‘rinbosari Ilzat Kasimov Xitoy Xalq Respublikasi Sanoat va axborotlashtirish vaziri o‘rinbosari Syun Szitszyun bilan uchrashdi.

Uchrashuv davomida raqamli transformatsiya, sun’iy intellektni joriy etish va sanoatni modernizatsiya qilish masalalari muhokama qilindi.

Tomonlar raqamli texnologiyalar, “aqlli” yechimlar, katta ma’lumotlar (big data) va bulutli hisoblash sohasidagi hamkorlikni kengaytirish istiqbollarini muhokama qildilar.

Ayniqsa, sanoatni raqamlashtirish, ishlab chiqarish jarayonlarini avtomatlashtirish tajribasi almashinuvi hamda qo‘shma texnologik platformalar yaratish masalalariga alohida e’tibor qaratildi.

O‘zbekiston tomoni “Raqamli O‘zbekiston - 2030” strategiyasi doirasidagi tashabbuslarni taqdim etdi. Ular IT-infratuzilmani rivojlantirish, startaplarni qo‘llab-quvvatlash va malakali kadrlar tayyorlashga yo‘naltirilgan.

Shuningdek, Xitoy kompaniyalari ishtirokida intellektual hisoblash markazlarini tashkil etish va sanoatning “Internet of Things” tizimini rivojlantirish bo‘yicha loyihalar faol amalga oshirilayotgani ta’kidlandi.

Muzokaralar yakunida tomonlar Xitoy Sanoat va axborotlashtirish vazirligi hamda Markaziy Osiyo mamlakatlari tegishli idoralari o‘rtasida hamkorlik to‘g‘risidagi Memorandumni imzolashga tayyor ekanliklarini tasdiqladilar. Ushbu hujjat mintaqaning yagona raqamli makonini shakllantirish yo‘lidagi muhim qadam bo‘ladi.