Toshkent, O‘zbekiston (UzDaily.uz) — BMTning Oziq-ovqat va qishloq xo‘jaligi tashkiloti (FAO) va O‘zbekiston Respublikasi Qishloq xo‘jaligi vazirligi hamkorligida "Yer kodeksini qayta ko‘rib chiqishni qo‘llab-quvvatlash" (TCP/UZB/4003) loyihasi amalga oshirilmoqda. Ushbu loyiha doirasida xalqaro ekspertlar delegatsiyasi O‘zbekistonda yer munosabatlari va yerdan foydalanish sohasidagi huquqiy asoslarni takomillashtirishga qaratilgan keng ko‘lamli muhokamalar o‘tkazdi.

Mazkur texnik hamkorlik loyihasi O‘zbekistonning yer boshqaruvi tizimini xalqaro ilg‘or tajribalarga muvofiq modernizatsiya qilish, yer munosabatlari va foydalanish sohasidagi huquqiy mexanizmlarni takomillashtirish, yer huquqlarini muhofaza qilishni kuchaytirish hamda qishloq xo‘jaligi yerlari bozorini samarali rivojlantirishga qaratilgan.

FAOning xalqaro ekspertlar guruhi — Morten Xartvigsen, Bredli Paterson va Tomas Versinskas — O‘zbekistonga tashrif davomida milliy manfaatdor tomonlar bilan qator uchrashuvlar o‘tkazdi. Ekspertlar Qishloq xo‘jaligi vazirligi, Tuproqshunoslik va agrokimyoviy tadqiqotlar instituti, “O‘zdaverloyiha” davlat ilmiy loyihalash instituti, Veterinariya va chorvachilikni rivojlantirish qo‘mitasi vakillari bilan uchrashuvlar o‘tkazdi. Bundan tashqari, delegatsiya Iqtisodiyot va moliya vazirligi, Prezident huzuridagi Strategik islohotlar agentligi, Suv xo‘jaligi vazirligi, Adliya vazirligi, O‘zbekiston Fermerlari kengashi va Oliy Majlis Qonunchilik palatasi mutaxassislari bilan alohida muloqotlar o‘tkazdi.

"Ushbu missiya O‘zbekistonning qishloq xo‘jaligida yer boshqaruvi tizimini modernizatsiya qilish bo‘yicha hamkorlik saʼy-harakatlarimizda muhim qadam hisoblanadi”, — dedi loyiha koordinatori Narimon Nishonov. “FAO ekspertlari tomonidan berilgan tavsiyalar yer islohotlarini xalqaro standartlarga muvofiqlashtirish bilan bir vaqtda milliy ustuvor vazifalarni amalga oshirishda muhim rol o‘ynaydi."

Loyiha doirasida yer mulkini masʼuliyatli boshqarish bo‘yicha xalqaro qo‘llanmalar (VGGT) asosida tenglik, oshkoralik va jamoatchilik ishtirokini taʼminlash masalalariga alohida eʼtibor qaratilmoqda. Ekspertlar Sirdaryo viloyati Oqoltin va Sardoba tumanlarida qishloq xo‘jaligi yerlarini boshqarish amaliyotini o‘rganib chiqdi.

Tahlil va maslahatlashuvlar natijasida ishlab chiqilgan tavsiyalar O‘zbekiston yer qonunchiligini takomillashtirish, mamlakatning iqtisodiy rivojlanish maqsadlari va barqaror yer boshqaruvi amaliyotlarini qo‘llab-quvvatlashga xizmat qiladi.

FAOning ushbu tashabbusi O‘zbekistonda yer islohotlarini samarali amalga oshirish, huquqiy bazani mustahkamlash va xalqaro hamkorlikni kuchaytirishga yo‘naltirilgan uzoq muddatli hamkorlikning muhim qismi hisoblanadi.