Eron osmonidagi vaziyat sabab Toshkent, Farg‘ona va Samarqandga reyslar bekor qilindi va orqaga qaytarildi

Toshkent, O‘zbekiston (UzDaily.uz) — Eron havo makoni yopilgani munosabati bilan qator xalqaro aviareyslar o‘z yo‘nalishini o‘zgartirishga va uchib chiqqan aeroportlariga qaytishga majbur bo‘ldi.

Xususan, Fly One Asia aviakompaniyasining Madina—Toshkent yo‘nalishi bo‘yicha harakatlangan 7Q7742 reysi Madina aeroportiga qaytdi. Shuningdek, ushbu aviakompaniyaning Madina—Farg‘ona yo‘nalishi bo‘yicha amalga oshirilayotgan 7Q4442 reysi bo‘yicha ham shunday qaror qabul qilinib, havo kemasi Madinaga orqaga qaytgan.

Jazeera Airways aviakompaniyasining Toshkent—Quvayt yo‘nalishidagi J9650 reysi mahalliy vaqt bilan soat 02:01 da Toshkentdan uchib chiqqanidan so‘ng havoda orqaga burilib, poytaxt aeroportiga qaytarilgan.

Sam Air aviakompaniyasining Samarqand—Jidda yo‘nalishi bo‘yicha 9S3303 reysini amalga oshirgan samolyot mahalliy vaqt bilan 02:04 da Samarqanddan uchib chiqqanidan keyin jo‘nash aeroportiga qaytgan. Xuddi shu sababga ko‘ra, Fly Khiva aviakompaniyasining Urganch—Madina yo‘nalishi bo‘yicha 02:17 da uchib chiqqan 2U7911 reysi ham Urganch aeroportiga qaytishga majbur bo‘lgan.

Bundan tashqari, Uzbekistan Airways aviakompaniyasining Jidda—Toshkent yo‘nalishidagi HY336 reysi Eron havo makoni yopilgani sababli Jidda aeroportiga qaytarilgan.

Aviakompaniyalar va tegishli xizmatlar vaziyatni kuzatishni davom ettirmoqda va jadvaldagi keyingi o‘zgarishlar haqida yo‘lovchilarni xabardor qilmoqda.