Buxoro viloyatida 20 abituriyent zaharlanish alomatlari bilan kasalxonaga yotqizildi

Toshkent, O‘zbekiston (UzDaily.uz) — 11 yanvar kuni ijtimoiy tarmoqlarda Buxoro viloyatida bir guruh talabalar zaharlanish alomatlari bilan kasalxonaga yotqizilgani haqida maʼlumot paydo bo‘ldi.

Viloyat sog‘liqni saqlash boshqarmasi mazkur vaziyat bo‘yicha izoh berdi.

Idora maʼlumotlariga ko‘ra, voqea Qorako‘l tumani Xo‘jalar mahallasida, Ulug‘bek ko‘chasida joylashgan Ilm nuri taʼlim markazida sodir bo‘lgan.

20 abituriyentda nomaʼlum modda bilan zaharlanish alomatlari qayd etilgan. Xabar kelib tushgandan so‘ng, barcha jabrlanganlar tezkorlik bilan tuman tibbiyot birlashmasiga yetkazilib, ularga zarur tibbiy yordam ko‘rsatilgan.

Sog‘liqni saqlash boshqarmasi xabar berishicha, barcha bemorlarning ahvoli yaxshilangani sababli, ambulator davolanish uchun uyiga javob berilgan. Har bir bemorga masofaviy ahvolini kuzatib borish uchun hududiy oila shifokori va patronaj hamshira biriktirilgan.

Hozirda jabrlanganlarning ahvoli qoniqarli deb baholanmoqda va hech qanday shikoyatlar kelib tushmagan.

Voqeaning sabablari aniqlanmoqda. Ekspertiza yakunlangach qo‘shimcha maʼlumot taqdim etiladi.