Toshkent, O‘zbekiston (UzDaily.uz) — Turkiyaning chegaralari ishonchli muhofaza va sutkalik nazorat ostida. Prezident maʼmuriyati qoshidagi Aloqalar boshqarmasiga qarashli Dezinformatsiyaga qarshi kurash markazi xabariga ko‘ra, raqamli ommaviy axborot vositalarida tarqalgan Erondan Turkiyaga go‘yoki boshlangan muhojirlar to‘lqini haqidagi iddaolar haqiqatga to‘g‘ri kelmaydi.

Isroil tomonidan Eronga yaqinda amalga oshirilgan hujumdan so‘ng, ijtimoiy tarmoqlarda Eron-Turkiya chegarasi orqali ommaviy muhojirat ro‘y berayotgani haqida xabarlar paydo bo‘ldi. Biroq, Markaz taʼkidlashicha, ushbu maʼlumotlar dezinformatsiya bo‘lib, aniq dalillarga tayanadigan asosga ega emas.

Turkiya Ichki ishlar vazirligi rasman maʼlum qilishicha, mamlakatning sharqiy chegaralarida noqonuniy kesib o‘tish holatlarida hech qanday o‘sish yoki g‘ayritabiiy faollik qayd etilmagan. Barcha chegara chiziqlarida zamonaviy muhofaza vositalari faoliyat yuritmoqda: muhofaza devorlari, to‘lqinlarni his etuvchi kameralar, yorug‘lik tizimlari, elektrooptik va ko‘tariladigan minoralar, shuningdek, zirhlangan kuzatuv mashinalari. Shu bois har qanday noqonuniy o‘tish urinishi masʼul organlar tomonidan tezda bartaraf etiladi.

Markaz taʼkidlashicha, tarqatilayotgan yolg‘on maʼlumotlar jamiyatda vaziyatni noto‘g‘ri anglashga sabab bo‘lish, ksenofobiyani qo‘zg‘atish va jamoat tartibini izdan chiqarish maqsadini ko‘zlaydi. Shu munosabat bilan fuqarolardan hech qanday hadikka berilmaslik va faqat rasmiy idoralar tomonidan eʼlon qilingan ishonchli manbalardek xabaralarga ishonish so‘ralmoqda.

Bunday destruktiv maʼlumotlarni tarqatayotgan shaxslarga nisbatan amaldagi qonunchilik asosida huquqiy choralar ko‘rilishi maʼlum qilindi. Dezinformatsiyaga qarshi kurash xolis axborot tarqatish, fuqarolik jamiyati bilan faol hamkorlik va huquqiy instrumentlar orqali davom ettiriladi.

Ijtimoiy tarmoqlarda tarqalgan “Isroil fuqarolik aviatsiyasining bir qismi Turkiyada joylashtirilgan” degan iddao ham haqiqatga to‘g‘ri kelmaydi.

Turkiya va Isroil o‘rtasida fuqarolik yoki harbiy aviatsiya operatsiyalari butunlay to‘xtatilgani sababli, hech qanday isroillik samolyot mamlakatimiz aeroportlari yoki angarlarida joylashtirilmagan.

Turkiya Isroil tomonidan falastinliklarga nisbatan amalga oshirilayotgan shafqatsiz va vahshiy hujumlardan so‘ng mazkur davlat bilan barcha parvozlar va aviatsiyaviy hamkorlikni to‘xtatgan.

Bundan tashqari, Isroil rasmiy shaxslariga Turkiya havo fazosidan foydalanish qatʼiyan taqiqlangan. Bu haqda vaqt-vaqti bilan ommaviy axborot vositalarida ham xabar berib kelingan.