Zomin tumanida ikki yoshli bolaning halok bo‘lishiga sababchi bo‘lgan haydovchi yetti yilga ozodlikdan mahrum etildi

Toshkent, O‘zbekiston (UzDaily.uz) — Jizzax viloyati Zomin tuman sudi ikki yoshli bola halok bo‘lgan yo‘l-transport hodisasi bo‘yicha ishni ko‘rib chiqib, hukm chiqardi. Aybdor deb 31 yoshli erkak — “Zomin” sanatoriyasida feldsher bo‘lib ishlagan shaxs topildi.

Sud uni yetti yil muddatga manzil-koloniyada jazo o‘tash sharti bilan ozodlikdan mahrum qildi hamda uch yilga transport vositalarini boshqarish huquqidan mahrum etdi.

Fojiali hodisa o‘tgan yil yozida sodir bo‘lgan. Tergov maʼlumotlariga ko‘ra, haydovchi orqaga harakatlanish vaqtida bolani payqamay qolib, uni urib ketgan.

Shundan so‘ng u tezkor xizmatlarga murojaat qilish o‘rniga bolaning jasadini o‘z uy hovlisiga olib kirib, daraxt ostida qoldirgan.

Bolani qidirish ishlari ikki hafta davom etgan. Uni jasadi qishloq atrofidagi tog‘li hududdan topilgan. Tergov jarayonida haydovchining ham bolani urib ketgani, ham uning o‘limi faktini yashirgani aniqlangan.

Sudlanuvchining harakatlari O‘zbekiston Respublikasi Jinoyat kodeksining 117-moddasi 2-qismi («Odam o‘limiga sabab bo‘lgan xavfda qoldirish») va 266-moddasi 2-qismi («Odam o‘limiga olib kelgan harakat xavfsizligi qoidalarini buzish») bilan kvalifikatsiya qilindi.

Sud hukmi yo‘l harakati qoidalarini buzgan shaxslarga nisbatan qatʼiy yondashuvni aks ettirib, yo‘l-transport hodisasi oqibatlarini yashirish orqali inson o‘limiga sabab bo‘lganlik uchun javobgarlik muqarrar ekanini taʼkidlaydi.