YXHT yangi avlod jurnalistlarini tayyorlashga ko‘maklashmoqda

Toshkent, O‘zbekiston (UzDaily.uz) — Toshkentdagi Xalqaro Nordik universitetining anjumanlar zalida ish qizg‘in davom etmoqda: yosh jurnalistlar va talabalar soha mutaxassislaridan  zamonaviy media makonda qanday ishlash va sifatli mahsulot - qiziqarli, xolis, eng muhimi, ishonchli yangiliklar, hikoyalar, videoreportajlar va boshqa media materiallarni yaratishni o‘rganmoqda.

“Zamonaviy media: huquq, xavfsizlik va raqamli vositalar” mavzusidagi besh kunlik kurs 2-5 dekabr kunlari YXHTning O‘zbekistondagi loyihalar koordinatori, Milliy mass-mediani qo‘llab-quvvatlash va rivojlantirish jamoat fondi, Xalqaro Nordik universiteti va Zamonaviy jurnalistikani rivojlantirish markazi tomonidan tashkil etildi.

Dastur shunday tuzilganki, har kuni ishtirokchilarga yangi ufqlarni ochadi. Ishtirokchilar ommaviy axborot vositalari to‘g‘risidagi qonunchilik asoslarini hamda davlat organlaridan ma’lumot olishni o‘rganadilar. Axloq va axborot xavfsizligiga alohida e’tibor qaratiladi. Bu masalalar shunchaki nazariy emas, balki hayotiy misollar va amaliy munozaralar orqali ko‘rib chiqiladi. Keyingi qadam – faktlarni tekshirish, chunki dezinformatsiyani aniqlash va olingan ma’lumotlarning to‘g‘riligini tekshirish qobiliyati zamonaviy jurnalistning asosiy ko‘nikmalaridan biriga aylanmoqda.  

Hayotimizda mustahkam o‘rin egallagan raqamli texnologiyalar va sun’iy intellektga alohida e’tibor qaratilmoqda. Sun’iy intellekt vositalari g‘oyalar yaratish va materiallar tayyorlashda yordam beradi, biroq ulardan foydalanishning axloqiy jihatlari hamda avtomatlashtirish davrida ma’lumotlarning aniqligi va ishonchliligini saqlab qolish masalasi ham muhokama qilinmoqda

Mutaxassislar rahbarligida yosh jurnalistlar smartfondan sifatli video suratga olishni, ijtimoiy tarmoqlar uchun kontent yaratishni va auditoriya metrikalarini tahlil qilishni o‘rganadilar.

Besh kunlik kurs nafaqat kasbiy ko‘nikmalarni rivojlantirish, balki yosh jurnalistlarda tanqidiy fikrlash va mas’uliyatni shakllantirishga qaratilgan. O‘quv kursi "Gender asosidagi zo‘ravonlikka qarshi 16 kunlik faollik" kampaniyasi doirasida o‘tkazilmoqda - bu yil kampaniya raqamli zo‘ravonlik masalalariga e’tibor qaratadi. Bu professional jurnalistika, mediasavodxonlik, onlayn xavfsizlik va mas’uliyatli kontent yaratish masalalarining muhimligini ta’kidlaydi.