YUNISEF O‘zbekistonda taʼlim tizimini raqamli transformatsiya qilish zarurligini taʼkidladi

Toshkent, O‘zbekiston (UzDaily.uz) — O‘qituvchi va ustozlar kuni munosabati bilan tashkilot mamlakatda pedagoglarning asosiy o‘rnini eʼtirof etdi. YUNISEF maʼlumotlariga ko‘ra, maktablarda 540 ming, maktabgacha taʼlim muassasalarida esa 174 ming pedagog faoliyat ko‘rsatmoqda va ular har kuni yangi avlodning ko‘nikma hamda qadriyatlarini shakllantirishga hissa qo‘shmoqda.

YUNISEFning O‘zbekistondagi vakolatxonasi rahbari Rexina Kastijio shunday deydi: «O‘qituvchilar — taʼlimning poydevori va o‘zgarish hamda innovatsiyalarning harakatlantiruvchi kuchidir. Texnologiya va sunʼiy intellekt ularni almashtirmasligi kerak, aksincha, ular texnologiyadan unumli foydalanish, o‘quv jarayonini shaxsiylashtirish, ijodiy ruhlantirish va har bir bolaning imkoniyatlarini kengaytirish qobiliyatiga ega bo‘lishi lozim».

YUNISEF O‘zbekiston hukumati bilan hamkorlikda pedagoglarning kasbiy o‘sishini, raqamli yangiliklarni joriy etish va taʼlimda inklyuziv amaliyotlarni qo‘llab-quvvatlashni davom ettirmoqda. Amalga oshirilgan tashabbuslar qatorida sunʼiy intellekt asosida matematika o‘qitish sifatini yaxshilash uchun ishlab chiqilgan vositalardan foydalanish, natijadorlikni 17 foizga oshirgan Eduten va Teacher Pro pilot loyihalari, shuningdek, qariyb 40 ming tarbiyachi uchun imkoniyat yaratgan Bolalik Akademiyasi platformasi mavjud.

Shu bilan birga, Islom taraqqiyot banki ko‘magida Jalinga studiyasi aralash taʼlim uchun sunʼiy intellekt asosida raqamli va multimediaviy resurslar tayyorlamoqda. Bu tashabbus pedagoglar salohiyatini oshirish hamda taʼlim jarayonini zamon talabiga mos ravishda modernizatsiya qilish imkonini bermoqda.

YUNISEF va Maktabgacha hamda maktab taʼlimi vazirligi besh yil ichida barcha pedagoglarni zamonaviy metodika va raqamli ko‘nikmalar bilan qamrab olishni maqsad qilgan. Dastur tez surʼatda o‘zgarib borayotgan zamonda 6,5 milliondan ziyod maktab o‘quvchilari va qariyb 2,4 million maktabgacha yoshdagi bolalar uchun taʼlim sifatiga sezilarli darajada taʼsir ko‘rsatishi kutilmoqda.

Rexina Kastijio: «O‘qituvchi va ustozlar kunida biz O‘zbekiston bo‘ylab 600 mingdan ortiq pedagoglarni milliy islohotlarning haqiqiy mualliflari va inson kapitali taraqqiyotining harakatlantiruvchi kuchlari sifatida qadrlaymiz», — deya taʼkidladi.