Yaqin kunlarda sovuq tushishi va havo ifloslanishining vaqtinchalik oshishi kutilmoqda

Toshkent, O‘zbekiston (UzDaily.uz) — O‘zbekiston Respublikasi hududiga sovuq antitsiklon kirib kelmoqda, uning taʼsiri bosqichma-bosqich namoyon bo‘ladi. Bu haqda O‘zgidromet xabar qildi.

Antitsiklon kirib kelish davrida atmosferada havo almashinuvi susayishi kutilmoqda, bu esa ifloslantiruvchi moddalar hamda mayda zarrachalar — PM2,5 va PM10 to‘planishiga olib kelishi mumkin. Natijada atmosfera havosining ifloslanish ko‘rsatkichlari vaqtinchalik oshishi ehtimoli bor. Ushbu sharoitlar uch kungacha saqlanib turishi mumkin.

Antitsiklon taʼsiri kuchayishi bilan 16–17 yanvar kunlari mamlakatning deyarli barcha hududlarida havo harorati pasayishi prognoz qilinmoqda.

Kunduzgi haroratning pasayishi tungi va ertalabki soatlarda sovuqning yana-da kuchayishi bilan kuzatiladi.

Shu bilan birga, antitsiklon taʼsiri ostida ayrim hududlarda yog‘ingarchilik kutilmoqda. Ayrim joylarda qisqa muddatli yomg‘ir va qor yog‘ishi, shuningdek, shamol kuchayishi mumkin.

Ushbu omillar atmosferada to‘plangan ifloslantiruvchi moddalar va mayda zarrachalarning tozalanishiga xizmat qilib, havo sifatining vaqtinchalik yaxshilanishiga olib kelishi mumkin.