Toshkent, O‘zbekiston (UzDaily.uz) — Yandex Uzbekistan Yandex ML School'ga qabul jarayonini boshladi — mamlakatdagi ilk markaz, yuqori darajadagi sun’iy intellekt mutaxassislarini tayyorlashga yo‘naltirilgan: mashinani o‘rganish, matematika va ma’lumotlar tahlili bo‘yicha. Qatnashish uchun dastlab kirish testini topshirish talab etiladi. Muvaffaqiyatli nomzodlar sentyabrning ikkinchi yarmida Toshkentda bo‘lib o‘tadigan shaxsiy suhbatga taklif etiladi. Barcha saralash bosqichlaridan o‘tganlar oktyabrda o‘qishni boshlaydilar. Dastur to‘liq bepul.

Ta’lim offlayn formatda Toshkentda o‘tkazilib, ikki semestrlik intensiv tayyorgarlikni o‘z ichiga oladi. Dastur fundamental yondashuv asosida ishlab chiqilgan bo‘lib, uni Mashina o‘rganish bo‘yicha yetakchi o‘quv markazlaridan biri — Yandex'ning “Ma’lumotlarni tahlillash maktabi” (MTM) mutaxassislari tayyorlagan. Unda chuqur nazariy bilim va amaliy ko‘nikmalar uyg‘unlashgan. O‘qituvchilar orasida Yandex ekspertlari, O‘zbekistonning yetakchi universitetlari professorlari va ML sohasidagi tajribali mutaxassislar bor.

"Mamlakat rahbariyati inson kapitali rivojiga alohida e’tibor qaratmoqda. Sifatli ta’lim jiddiy investitsiya talab etadi, shu bois kompaniyalar tomonidan moliyalashtirilayotgan ta’lim tashabbuslari mamlakatning barqaror rivojlanishi uchun ayni muddao. Yandex ML School Uzbekistan kabi bepul o‘quv markazlarining paydo bo‘lishi sifatli bilimlarga yetarlicha kirish imkonini kengaytiradi, iqtidorli yoshlarga o‘zini namoyon qilishga yordam beradi va raqobatbardosh iqtisodiyotni shakllantirishga hissa qo‘shadi. Boshqa kompaniyalarni ham yoshlarimiz malakasini oshirishga ko‘proq investitsiya kiritishga chaqirib qolamiz", — dedi O‘zbekiston raqamli texnologiyalar vaziri Sherzod Shermatov.

Yandex ML School ta’lim tizimi matematika, mashinani o‘rganish, statistika va algoritmlar asosiga qurilgan. Dastur amaliyotga yo‘naltirilgan: talabalar tarmoqdan olingan haqiqiy masalalarni yechadilar, katta hajmli uy vazifalarini bajaradilar, o‘qituvchilardan muntazam fikr-mulohaza oladilar, amaliy vorkshoplar va industrial uikendlarda ishtirok etadilar. Darslar ingliz tilida olib boriladi, bu esa xalqaro darajadagi kasbiy materiallarga yo‘l ochadi va bitiruvchilarning jahon mehnat bozorida raqobatbardoshligini oshiradi. Haftalik yuklama 20–30 soatni tashkil qiladi: mashg‘ulotlar kechqurun o‘tkaziladi, qolgan vaqt mustaqil ishga ajratiladi.

Yandex ML School har yili senior darajasidagi mutaxassislarni tayyorlaydi, dolzarb vazifalarni yechish, texnologik mahsulotlar yaratish va jahon miqyosidagi yechimlarni mamlakat iqtisodiyotiga joriy qilish qobiliyatiga ega professionallar jamoasini shakllantiradi.

Yandex ML School'ning yo‘lga qo‘yilishi kompaniyaning O‘zbekistonda texnologiyalar sohasida ta’limni rivojlantirish strategiyasini davom ettiradi. Bu strategiya maktab o‘quvchilaridan tortib, informatika o‘qituvchilari uchun kurslar va mutaxassislar uchun intensiv dasturlarini qamrab oladi.

Arizalar 10 sentyabrga qadar qabul qilinadi.