Toshkent, O‘zbekiston (UzDaily.uz) — Toshkent shahrining Yakkasaroy tumanida profilaktika inspektori fojeali holatning oldini oldi — u 15 yoshli qiz bolaning o‘zini to‘qqiz qavatli uy tomidan tashlab o‘ldirishining oldini oldi. Bu haqda 16 iyul kuni poytaxt IIBB matbuot xizmati xabar berdi.

Taxminan soat 6:40 da mahallada o‘rnatilgan «tezkor tugma» orqali navbatchi qismiga voqea haqida signal kelib tushgan. Hodisa joyiga darhol tuman IIB boshlig‘i Muhtor Ahmedov rahbarligidagi tezkor guruh yo‘l olgan.

Ahmedovning maʼlum qilishicha, uy tomiga profilaktika inspektori Sanjar Bekmurodov yo‘l olgan, o‘sha paytda uning o‘zi yerdagi xodimlarning harakatlarini muvofiqlashtirib turgan. Bir kvartiraning balkoni orqali Bekmurodov qizga bir necha metr masofagacha yaqinlashgan.

O‘spirin og‘ir ruhiy holatda bo‘lib, o‘zini tajovuzkor tutayotgan edi. Inspektor 30 daqiqa davomida u bilan suhbat olib borib, ishonch qozonish va fojeali qadamdan qaytarishga uringan. Maʼlum bir paytda u qizga yaqinlashib, xavfsiz joyni egallab, uning yiqilib ketishining oldini olgan.

Yordamga yana bir xodim yetib kelgan va u qo‘shni podyezd tomi orqali inspektorga kamar uzatgan. Bekmurodov shu kamar yordamida qizni mustahkamlab, uni tushib ketishdan saqlab qolgan. U qizning bir necha marta qochish urinishlariga qaramay, taxminan 15 daqiqa davomida uni ushlab turgan.

Favqulodda vaziyatlar boshqarmasi xodimlari yetib kelganidan so‘ng tomga arqan tushirilib, uning yordamida qizni parapetdan to‘liq olib chiqishga muvaffaq bo‘lingan. Qutqaruv operatsiyasidan so‘ng u ota-onasiga topshirilgan.

Toshkent shahar IIBB ota-onalarni farzandlarining ruhiy-emotsional holatiga alohida eʼtibor berishga chaqirar ekan, oilada ishonchli munosabatlarning muhimligini taʼkidladi.