Xusanov «Manchester Siti»ga Angliya Kubogi yarim finaliga chiqishda yordam berdi

Toshkent, O‘zbekiston (UzDaily.uz) — «Manchester Siti» “Etihad” stadionida bo‘lib o‘tgan chorak final uchrashuvida “Liverpul”ni 4:0 hisobida yirik mag‘lubiyatga uchratib, Angliya Kubogi yarim finaliga ishonchli yo‘l oldi. Uchrashuv qahramoni norvegiyalik hujumchi Erling Xoland bo‘lib, u xet-trik muallifiga aylandi.

Hisobni 39-daqiqada Xolandning o‘zi penaltini aniq amalga oshirish orqali ochdi. Tanaffus arafasida, 45-daqiqada, u o‘yindan kiritilgan zarba bilan “Liverpul”ning gruziyalik darvozaboni Georgiy Mamardashvili darvozasini yana ishg‘ol qildi. Uchrashuv qayta boshlanishi bilan, 50-daqiqada, Gana terma jamoasi hujumchisi Antuan Semenyo hisobni oshirdi, 57-daqiqada esa Xoland uchrashuvdagi uchinchi golini kiritib, xet-trikni rasmiylashtirdi.

64-daqiqada “Liverpul” hisobni qisqartirish imkoniyatiga ega bo‘ldi: Muhammad Saloh penalti tepdi, biroq “shaharliklar” darvozaboni Jeyms Trafford misrlik futbolchining zarbasini qaytarib, darvozani daxlsiz saqlab qoldi.

Uchrashuvda eʼtiborga loyiq jihatlardan biri — o‘zbekistonlik himoyachi Abduqodir Xusanovning o‘yini bo‘ldi. U Xosep Gvardiola shogirdlari safida asosiy tarkibda maydonga tushib, barcha 90 daqiqa davomida o‘ynadi. Sofascore portali uning o‘yinini 7,4 ballga baholadi.

«Manchester Siti»ning yarim finaldagi raqibi 5 aprel kuniga belgilangan qurʼa tashlash natijasida aniqlanadi — u «Vest Xem» va “Lids” o‘rtasidagi so‘nggi chorak final bahsidan keyin maʼlum bo‘ladi.