Xusanov dunyodagi eng kam baholangan futbolchilardan biri deb topildi

Toshkent, O‘zbekiston (UzDaily.uz) — Angliyaning «Manchester Siti» klubi himoyachisi Abduqodir Xusanov The Athletic nashri talqiniga ko‘ra dunyodagi eng kam baholangan futbolchilar ro‘yxatiga kiritildi.

Ushbu reytingga shuningdek Federiko Valverde, Bernardu Silva, Joau Nevesh, Xarri Keyn, Maykl Olise va Viktor Osimxen kabi mashhur futbolchilar ham kiritilgan.

The Athletic taʼkidlashicha, ko‘plab muxlislar Xusanovning o‘tgan mavsumda “Chelsi”ga qarshi o‘yindagi muvaffaqiyatsiz debyutini eslab qolishgan, o‘shanda himoyachi xatoga yo‘l qo‘ygan va o‘ziga ishonchsiz ko‘ringan edi.

Shunga qaramay, u qisqa vaqt ichida bu taassurotni o‘zgartirishga muvaffaq bo‘lib, barqaror o‘yin namoyish eta boshladi.

Nashr maʼlumotiga ko‘ra, joriy mavsumda 22 yoshli futbolchi sezilarli darajada o‘sishga erishgan.

Xusanovning asosiy sifatlari sifatida yuqori tezlik, o‘yinni yaxshi o‘qish qobiliyati va to‘p uchun agressiv kurashish ko‘nikmalari qayd etilgan.

Mutaxassislar fikriga ko‘ra, aynan shu jihatlar uni zamonaviy futbolning istiqbolli va kam baholangan o‘yinchilaridan biriga aylantirmoqda.