Xorijiy investorlar kengashining ishchi guruhi yer munosabatlari sohasidagi islohotlarni ko‘rib chiqdi

Toshkent, O‘zbekiston (UzDaily.uz) — 2025-yil 10-oktabr kuni O‘zbekiston Respublikasi Prezidenti huzuridagi Xorijiy investorlar kengashi huzuridagi Yer ajratish tartibini takomillashtirish bo‘yicha Ishchi guruh yig‘ilishi bo‘lib o‘tdi.

Yig‘ilish Investitsiyalar, sanoat va savdo vazirligi, Iqtisodiyot va moliya vazirligi huzuridagi Kadastr agentligi, Xorijiy investorlar kengashi kotibiyati hamda “Kosta Legal” yuridik firmasi hamkorligida tashkil etildi.

Ishtirokchilarga yer munosabatlari sohasida olib borilayotgan islohotlar va yer siyosati konsepsiyasini ishlab chiqish bo‘yicha amalga oshirilayotgan ishlar taqdim etildi. Investorlar uchun dolzarb bo‘lgan masalalar - yer uchastkalarini ajratish tartibini soddalashtirish, yer fondi toifalarini o‘zgartirish, qishloq xo‘jaligi va o‘rmon yerlari olib qo‘yilganda kompensatsiya mexanizmlarini takomillashtirish masalalari muhokama qilindi.

Yig‘ilish yakunida muammolarni tahlil qilish va xalqaro tajriba asosida takliflar ishlab chiqish bo‘yicha davlat organlari, xorijiy investorlar va xalqaro moliya institutlari ishtirokida hamkorlikni davom ettirishga kelishib olindi.