Toshkent, O‘zbekiston (UzDaily.uz) — Xitoy Xalq Respublikasining Sinszyan-Uyg‘ur avtonom rayonida joylashgan Xorgos chegara nazorati punkti Xitoy va Yevropa o‘rtasidagi temir yo‘l yuk tashish yo‘nalishida eng muhim transport-logistika markazlaridan biri sifatida o‘z pozitsiyasini mustahkamlab bormoqda. “Sinxua” axborot agentligi maʼlumotlariga ko‘ra, 2025 yilning birinchi yarmida Xorgos orqali 471 ming standart 20-futli konteyner (TEU) tashilgan, bu o‘tgan yilning mos davriga nisbatan 26 foizga ko‘pdir.

2016 yilda Xorgos orqali Xitoy–Yevropa yo‘nalishi bo‘yicha birinchi yuk poyezdi yo‘lga qo‘yilganidan buyon 88 ta xalqaro temir yo‘l yo‘nalishi ochilgan bo‘lib, ular 18 ta mamlakatdagi 46 ta shaharni bog‘lagan. Har yili ushbu chegara punkti orqali 100 mingdan ortiq turdagi tovarlar tashiladi. Bu «Bir kamar – bir yo‘l» tashabbusi doirasida barqaror va yuqori samarali logistika yo‘laklarini taʼminlashga xizmat qilmoqda.

Yuk oqimi o‘sishining asosiy omillaridan biri — zamonaviy logistika yechimlarining joriy etilishidir. Joriy yilning may oyida Xorgos bojxonasi Xitoyda birinchi bo‘lib «aqlli temir yo‘l chegara punkti + manzilda tezlashtirilgan rasmiylashtirish» modelini amaliyotga tatbiq etdi. Bu chora import yuklar uchun rasmiylashtirish vaqtini 2–3 kundan 16 soatgacha qisqartirish imkonini berdi. Shuningdek, qaytib kelayotgan poyezdlar uchun o‘rtacha yuk ortish vaqti hozirda taxminan 2 soatni tashkil etmoqda.

Ayni paytda Xorgos orqali har kuni Xitoy–Yevropa yo‘nalishida 27 tadan ortiq poyezd o‘tmoqda. Bojxona xizmati kunu-tun ishlaydi va yuklar kelishi bilanoq ularning tekshiruvini amalga oshirmoqda.

Xalqaro logistika kompaniyasi “Xunʼan”ning Xorgos filiali operatsiyalar direktori Xan Sinning taʼkidlashicha, faqatgina joriy yilning birinchi yarmida ular 1 300 tadan ortiq poyezdga xizmat ko‘rsatishga muvaffaq bo‘lishgan. Bu o‘tgan yilning mos davriga nisbatan 10 foizga ko‘pdir.

Yuk tashish hajmining barqaror o‘sishini taʼminlash maqsadida Xorgos bojxonasi ish jarayonlarini takomillashtirishni davom ettirmoqda — bojxona nazorati temir yo‘l jarayonlariga integratsiya qilinmoqda, maxsus xizmat oynalari tashkil etilmoqda, tashqi iqtisodiy faoliyat ishtirokchilari ehtiyojlariga muvofiq individual logistika yechimlari taklif etilmoqda.